Act 5 | MED | STEP | Wu ti murum, ei nga mbi ei, Ananaiyas, wote ambᵾm nga mbi ei, Sapaira nᵾtᵾng. Wamp raⱡ nga mᵾi ti, wu mat ngukᵾⱡ, ku moni tᵾtᵾnggil.

Acts 5

Ananaiyas Kᵾn Sapaira Raⱡ Nga Timan

1 Wu ti murum, ei nga mbi ei, Ananaiyas, wote ambᵾm nga mbi ei, Sapaira nᵾtᵾng. Wamp raⱡ nga mᵾi ti, wu mat ngukᵾⱡ, ku moni tᵾtᵾnggil. 2 Wote, Ananaiyas ku moni titim nimbᵾ nga mat ou ndupa, elim timp nimba tepa ku moni mel wei kᵾralt mepa omba, nombuⱡa rung wu ni kᵾⱡ ngurum. Uⱡ ei, ambᵾm ndi pilpa, kapⱡa nilinga itim. 3 Ni kᵾn, Pita ndi, Ananaiyas kundpa, nimba mel, “Ananaiyas, nim Seitan ndi, nim nga numan orunga peka ropa moⱡnga, Muⱡnga Wingti ei, kol rokᵾn ngukᵾn, ku moni mat, ninim ambulkᵾn tekᵾn morun. 4 Nim unt, mᵾi ila ku ti nᵾtᵾtᵾn ei kᵾn, mᵾi ei nim nga ku. Wote, mᵾi ila ku moni titin ei kᵾn, ku moni ei nim nga ku. Ei kᵾn, nambuⱡ emel, ku moni mbᵾ, Got kᵾn mint nguimp nᵾkᵾn, numan raⱡ etkᵾn pitin? Nim wamp ti kᵾn, ik kol rokᵾn, ngui ngᵾnggᵾrᵾn mon. Nim Got kᵾn ik kol rokᵾn ngurun,” nitim.

5 Wote Ananaiyas ni, ik ni pilpa, tᵾngᵾnda mint koⱡpa, mboi nitim. Uⱡ itim ni nga pᵾtᵾng wamp mbᵾ, mundmong etᵾng.

6 Wote, kang wu mat ndi ok, Ananaiyas nga on ni, tek kom rok, mek puk on etᵾng.

7 Wote, ant mong raldika omba puⱡnga, Ananaiyas ambᵾm ni, uⱡ itim ni, pili napilpa, manga nila murᵾk urum. 8 Wote Pita ndi, amp ni, waldpa nimba mel, “Mᵾi ila ku moni tᵾnggil ei nga ku moni, ya kuraⱡ mint mendpᵾⱡ ei?” nitim. Wote amp ndi, ik punt ropa, nimba mel, “Wote int kᵾⱡ mint, ei ka!” nitim. 9 Wote Pita ndi, amp ni kundpa nimba mel, “Nambuⱡ emel, nim kᵾn, nim nga wanim raⱡ, Nuim ei nga Muⱡnga ei, oⱡa tᵾkᵾⱡ kanᵾnggil. Nim nga wanᵾm mek puk, on eng wu kᵾⱡ ndi, yant ok, nim nga on ei, akup mek ping ei nga keta puⱡ puⱡ ila, nokundᵾk mormin,” nitim. 10 Wote tᵾngᵾnda mint, amp ni, Pita nga kᵾmp puⱡ ila koⱡpa, mboi nitim. Kang wu ni kᵾⱡ, ruk ok kandrung ei, amp ni, kurum ila, on ni tᵾk mek ekit puk, wam on etᵾng wᵾng ila angᵾndᵾtᵾng. 11 Wote kona ila, Got nga rapa tenda wamp kᵾn, wote wamp wei mat kᵾn, uⱡ itim ei nga pᵾtᵾng wamp mbᵾ pora, mundmong minal etᵾng.

Uⱡ Rᵾpndi Elpa Elpa Mat Etᵾng

12 Uⱡ rᵾpndi wamp kᵾni nakᵾndᵾmᵾn mat, Jisas nga nombuⱡa rung wu nimbᵾ ndi, wamp morung nimbila etᵾng. Nuim ei, mondᵾk pᵾtmᵾn wamp nimbᵾ, numan omba tenda puⱡnga ok, Solomon nga kᵾpkᵾ titim kona nila mou rorung. 13 Wote, mondpa pili wamp mbᵾ nga ekit orunga, wamp rᵾⱡaip elpa nimbᵾ ndi, kaip minal nᵾndᵾtᵾng. Ei wote, ekit orunga wamp mou morung wamp rᵾⱡaip elpa mbᵾ nga mat, ruk ui nawᵾrᵾng. 14 Wote, mondpa pili wamp mou rorung nila wu kep, amp kep, wamp kont nga, minal rukᵾr oⱡungina, mondpa pili wamp mou ei mam itim. 15 Nombuⱡa rᵾng wu kᵾⱡ nga kongun etᵾng puⱡ ila kui wamp mbᵾ, nombuⱡa mam mbila mek ekit ok, muⱡ kombilik pendᵾk, Pita nga min ei ndi, ropa rᵾngᵾndangga, kui mbᵾ pora nangga, nᵾk etᵾng. 16 Ei kᵾn, wamp ou ndupa, Jerusalem kona peng ila nondpa tetᵾm kona peng mbila petmin wamp mbᵾ nga, en enim nga kui rurum wamp mbᵾ kᵾn, wote kur kit rukᵾr orunga murum wamp nimbᵾ, mek orung. Wamp nimbᵾ pora, etpa kai mundrum.

Nombuⱡa Rᵾng Wu Ni Kᵾⱡ, Mindil Kit Tᵾk Ngurung

17 Wote, wu pris kuimbal ei kᵾn, elim nga rᵾp wu mat, Sarusi rᵾⱡaip ila mat kunda, nombuⱡa rᵾng wu kᵾⱡ etᵾng uⱡ mbᵾ nga wᵾlᵾk rok, wu kᵾⱡ kᵾn, uⱡ mat itimin nᵾk pᵾtᵾng. 18 Nᵾk kᵾn, wu kᵾⱡ imp molk, tek kan manga ila pendᵾtᵾng. 19 Wote rumbuldi ei kᵾn, Got nga anggelo ti ndi, kan manga kumba ila, kumba tᵾpa tepa, wu ni kᵾⱡ, mepa ekit omba, nimba mel, “Enim manga wingti ila puk, wamp kont mul uⱡ ei nga ik ei pora, wamp mbᵾ kundᵾk nᵾi,” nitim.

21 Ni kᵾn, nombuⱡa rᵾng wu ni kᵾⱡ, ik ei pilik, kona ranggᵾⱡnga unt puk, manga wingti ila wamp mbᵾ kᵾn, ik mbo puⱡ mondᵾk endᵾtᵾng. Ei kᵾn, wu pris kuimbal ei kᵾn, elim nga rᵾp wu mbᵾ kᵾn, Jura wu kuimbal mbᵾ kᵾn, wi rok tᵾk mou rok molk, nombuⱡa rung wu kan manga ila petᵾng ni kᵾⱡ, mek weing nᵾtᵾng. 22 Wote, el wu nimbᵾ, puk kan manga ila kandrung ei, wu ni kᵾⱡ muⱡi nambrᵾng. Wote, el wu nimbᵾ, aldpa int puk, en enim nga wu nuim nimbᵾ kundᵾk, nᵾk mel, “Tᵾn kan manga ila ruk mbun kᵾnmᵾn ei, keta puⱡ puⱡ ei, kumba gi nimba pim. Wote, keta puⱡ puⱡ rᵾp etmin el wu nimbᵾ, moⱡung ku. Ei wote, kumba tᵾpᵾn, kan manga ila murᵾk mbun ei kᵾn, wamp ti muⱡi nambᵾⱡᵾm,” nᵾtᵾng. 24 Wote, manga wingti rup wu kuimbal ei kᵾn, wu pris kuimbal mbᵾ kᵾn, ik kᵾⱡ pilik, nombuⱡa rung wu ni kᵾⱡ etᵾk, eng mel nant nda nᵾk, numan ou nduk pᵾtᵾng. 25 Ei kᵾn, wu ti ndi omba, nimba mel, “Enim pinmin ye! Enim nga kan ngᵾk pendᵾng wu nimbᵾ, manga wingti ila wamp ik mbo endᵾk mormin ei ka!” nitim. 26 Wote, rᵾp wu kuimbal ni kᵾn, elim nga el wu nimbᵾ kᵾn, puk nombuⱡa rung wu nimbᵾ, tek mek orung. Puk ting etᵾk kᵾn, ronduⱡ mundᵾk uⱡ ti, iti natᵾtᵾng. Ei nambuⱡ emel, ronduⱡ mundᵾp nimin ndam, wamp mbᵾ ndi, en enim ku ndi ruing nᵾk pᵾtᵾng.

27 Wote, nombuⱡa rung wu ni kᵾⱡ mek ok, wu nuim nimbᵾ nga kuimp keta nila mondrung ila, wu pris kuimbal ni ndi, waldpa nimba mel, “Tᵾn ndi, enim kᵾn ronduⱡ mondpᵾn, enim Jisas nga mbi ila, wamp ik mbo rundi, mon nᵾtmᵾn! Wote, akup enim nga ik ei, Jerusalem kona ila pilik, kapⱡa endinmin ei ndi, Jisas ni, tᵾn ndi, rop kundurmin ninmin,” nitim. 29 Pita kᵾn, nombuⱡa rung wu kat kᵾn, punt rok nᵾk mel, “Tᵾn Got nga ik ei mendpᵾⱡ, pep ruimᵾn, wote wamp ti nga mon! 30 Enim ndi, Jisas nde peta ila pendᵾk, rok kondrung wu ni, wote tᵾn nga anda kouwᵾ nimbᵾ nga tipam Got elim ndi, ⱡoporpa tᵾpa oⱡa mundrum. 31 Wote Got ndi, mepa muⱡ kona ila oⱡa mba, elim nga ki mbo orunga, wamp Etpa Ti Wu Nuim ei mundrum. Nambuⱡ emel, wu ei ndi, Isrel wamp mbᵾ numan ropᵾl rangina wamp mbᵾ, nga uⱡ kit mbᵾ pendpa kelmba. 32 Muⱡnga Wingti tᵾn uⱡ kᵾndrᵾmᵾn mbᵾ nga pora nimba, mot ndonmun. Tᵾn kᵾn Got ndi, elim nga ik ei, kum teng wamp mbᵾ kᵾn, Muⱡnga Wingti ei, wei gem ngurum,” nᵾtᵾng.

33 Wu nimbᵾ ndi, nombuⱡa rung wu ni kᵾⱡ, ik nᵾtᵾng nimbᵾ, pilik popᵾⱡ kulk wu ni kᵾⱡ, rop kundmin nᵾtᵾng.

Wu Gamaliyel Ndi, Nombuⱡa Rung Wu Kᵾⱡ Nga Ik Nimba Kun Mundrum

34 Mi ik mbo wu ti, mbi tek, Gamaliyel nᵾtᵾng. Wu ei, Perisi wu ei, Moses nga mi ik kᵾⱡ, wamp mbᵾ mbo rondrum. Wu ei, wamp minal ndi, tᵾk ou ndurᵾng. Wu ni ndi, wu nuim morung nimbᵾ nga kuimp keta ila oⱡa anggilpa, kundpa nimba mel, “Nombuⱡa rᵾng wu mbᵾ, tᵾk pena ndangina, ant mong ralt pena ila muⱡeing,” nitim. 35 Ei mel elingina, wu Gamaliyel ndi, mukᵾr morung wu nimbᵾ, kundpa nimba mel, “Enim Isrel wu mbᵾ ye! Tᵾk pena ndunmin wu kᵾⱡ kᵾn, uⱡ ti itmin nᵾk, pᵾlᵾng ndam, numan tᵾk mondᵾk, pilik kun etᵾk mint itᵾi! 36 Ei kᵾn, enim pᵾtmin ni, kot unt mel, Tatiyas ni, wu ei, elim wu nuim ti mor ku, nimba pilpa, wu 400 elim kᵾn pep rorung. Wote wu ni, rok kondrung ei kᵾn, pep rok andrᵾng wu nimbᵾ, mbuⱡ mbaⱡ nilimina, kongun etᵾng uⱡ nimbᵾ, pora nitim. 37 Wote wu ei, kurum ni kᵾn, gapman ndi, wamp mbi titim ei kᵾn, Galili kona wu Juras ndi, oⱡa omba, elim wu nuim ti ku nimba, wamp minal rukᵾr tᵾpa itim. Wote wu ni, rok konduⱡina kᵾn, elim nga pep rok orung wamp nimbᵾ, kᵾni i ku etᵾk, mbuⱡ mbaⱡ nᵾtᵾng. 38 Uⱡ ei nga, na akup enim kundᵾp nᵾnt. Enim wu kᵾⱡ kᵾn, kᵾni nakᵾndᵾk uⱡ ti iting, ama mon! Wu kᵾⱡ, wak rop mundamin peing. Uⱡ enmin kᵾⱡ, wamp nga ronduⱡ tila eng ndam, etᵾk roⱡ pi nᵾping. 39 Wote uⱡ mbᵾ, Got nga ronduⱡ ila eng ndam, enim ndi kapⱡa rok, mana ndui nᵾnding. Wote, itimin nᵾk eng ndam, enim Got kᵾn el ruing!” nitim.

40 Wote, wu nuim ila morung nimbᵾ, wu Gamaliyel nga ik nitim nila, teng nduk Jisas nga nombuⱡa rung wu nimbᵾ, wi rok mukᵾr tᵾk, tᵾmbᵾⱡ ndi rok, Jisas nga mbi ila aldpa ik mbo indi, mon nᵾk, wak rok mundrung. 41 Ei nga, Jisas nga nombuⱡa rung wu ni kᵾⱡ ndi, wu nuim morung nimbᵾ nga manga ni, numan kai pilik, wak rok, pena orung. Ei nambuⱡ emel, Got ndi, pilim ila, tᵾn kapⱡa enim. Jisas nga mbi ila mindil tᵾk, wote pipil kulk etᵾk morung. 42 Uⱡ ei nga, rumbᵾⱡ ui mbila rᵾk rᵾk, manga wingti ou ila kep, wamp mang kona mbila kep, wote kona mbila pora, aldpa puⱡ mondᵾk, Jisas Wu Kraist, Got nga ngurum wu ei nga Rᵾnang Ik Kai mbᵾ, mbo rondrung.